L'exposiziun ans confrunta cun charezza e cun mort ed ans maina d'ina festa dal mument sensitiv a la passageritad ed a la fin da l'existenza. Il punct da partenza da l'exposiziun è in ciclus da 25 maletgs da la mort ch'èn vegnids creads l'onn 1543 tenor ils enconuschents entagls en lain da Hans Holbein il giuven per il chastè da l'uvestg da Cuira. Per il Museum d'art dal Grischun è l'avertura dal Museum dal stgazi da la catedrala a Cuira l'occasiun per deditgar in'atgna exposiziun al tema "saut dals morts". Empè da suandar la tradiziun iconografica che confruntescha la vita cun la mort, stattan en il center da l'exposiziun il saut, il moviment, l'extasa e la metamorfosa fin a la dissoluziun en la mort. L'exposiziun stenda in artg da l'antica fin il temp preschent e cumpareglia ovras da l'art figurativ cun objects istoric-culturals, cumpiglia tut las medias fin il film ed integrescha elements da la cultura da pop.

L'exposiziun ch'è vegnida curada da Stephan Kunz e da Stefan Zweifel parta dal mument dal moviment e mussa, cun ovras da Jackson Pollock, Willem de Kooning, Jean Tinguely, Rebecca Horn e Daniel Schmid, co che l'existenza e las basas segiradas da nossa vita vegnan dissolvidas en il moviment. A la fin maina ella en ina chombra mirvegliusa che stat sut l'ensaina dal memento mori e che confrunta objects istoric-culturals cun ovras da Albrecht Dürer fin Andy Warhol. Da l'autra vart suonda l'exposiziun la dinamica dal saut, stimulada da la voluptad e da la transcendenza metamorfotica dal corp en ovras dad Auguste Rodin e da Gustav Klimt fin Yves Klein, da Man Ray fin Markus Raetz, da Vaslav Nijinksy e da Sophie Taeuber-Arp fin Maurica Béjart. Partind dal cult antic dals morts e da misteris maina ella dentant er sur maletgs profunds da paraulas da Hans Christian Andersen, en il mund da cabaret.